Azia ishte rajoni më i prekur në botë nga fatkeqësitë klimatike, meteorologjike dhe ujore në vitin 2023, tha Organizata Botërore Meteorologjike (WMO), me përmbytjet dhe stuhitë që shkaktuan numrin më të madh të viktimave.

Në një raport të publikuar të martën, WMO tha se 79 fatkeqësi të lidhura me ngjarje hidro-meteorologjike ishin raportuar në Azi në vitin 2023. Më shumë se 80% e tyre lidheshin me përmbytjet dhe stuhitë që shkaktuan më shumë se 2000 vdekje.

“Shumë vende në rajon përjetuan vitin e tyre më të nxehtë rekord në 2023, së bashku me një sërë  kushtesh ekstreme, nga thatësirat dhe valët e të nxehtit deri te përmbytjet dhe stuhitë. Ndryshimet klimatike përkeqësuan shpeshtësinë dhe ashpërsinë e ngjarjeve të tilla”, tha Sekretarja e Përgjithshme e WMO, Celeste Saulo.

Azia po ngrohet më shpejt se mesatarja globale, sipas WMO. Vitin e kaluar, temperatura mesatare të larta u regjistruan nga Siberia perëndimore në Azinë qendrore, si dhe nga Kina lindore në Japoni.

Raporti theksoi gjithashtu se shumica e akullnajave në rajonin malor në Azi kishin humbje të konsiderueshme në masë për shkak të temperaturave të larta rekord dhe kushteve të thata./abcnews.al